ຫ້ອງການ ກະຊວງອຸດສາຫະກຳ ແລະ ການຄ້າ ໃນນາມໜ່ວຍງານຈັດຕັ້ງປະຕິບັດໂຄງການສ້າງຖານຂໍ້ມູນນິຕິກຳ

ຂອງຂະແໜງອຸດສາຫະກຳ ແລະ ການຄ້າ ໄດ້ຈັດພິທີປິດໂຄງການສ້າງຖານຂໍ້ມູນນິິຕິກຳຂອງຂະ​ແໜງ​ອຸດສາຫະກຳ ​ແລະ ການ​ຄ້າ ຊຶ່ງໄດ້ຮັບການຊ່ວຍເຫຼືອຈາກກອງທຶນການຮ່ວມມືແມ່ນໍ້າຂອງ-ສ.ເກົາຫຼີ (Mekong-ROK Cooperation Fund). ພິທີດັ່ງກ່າວຈະໄດ້ຈັດຂຶ້ນໃນວັນທີ 30 ກັນຍາ 2020 ​ທີ່ ໂຮງແຮມ ແລນມາກ ໂດຍການເປັນປະທານຂອງທ່ານ ນາງ ບານສະຕິ ເທບພະວົງ, ຫົວໜ້າຫ້ອງການກະຊວງ ອຄ, ຫົວໜ້າຄະນະຊີ້ນຳໂຄງການສ້າງຖານຂໍ້ມູນນິຕິກຳ ແລະ ເປັນຜູ້ຊີ້ນຳລວມວຽກງານການຈັດຕັ້ງປະຕິບັດວຽກງານການສ້າງຖານຂໍ້ມູນນິຕິກຳ. ໃນພິທີດັ່ງກ່າວ ໄດ້ການຮັບຟັງການລາຍງານ​​ຜົນສຳເລັດການຈັດຕັ້ງປະຕິບັດວຽກງານໂຄງການໄລຍະ 3 ປີຜ່ານມາໂດຍ ທ່ານ ນາງ ກິ່ງສະດອນ ເພັດດາວເຮືອງ, ຮອງຫົວໜ້າຫ້ອງການ ທັງຮອງຫົວໜ້າຄະນະຜິດຊອບຊີ້ນຳໂຄງການ ແລະ ​ແນະນຳການໃຊ້​ເວັບ​ໄຊ​ຖານ​ຂໍ້​ມູນ​ນິ​ຕິ​ກຳ .

ໂຄງການສ້າງຖານຂໍ້ມູນນິຕິກຳຂອງຂະແໜງອຸດສາຫະກຳ ແລະ ການຄ້າ ແມ່ນ ໂຄງການທີ່ໄດ້ຮັບການຊ່ວຍເຫຼືອຈາກ ກອງທຶນການຮ່ວມມືແມ່ນຳ້ຂອງ-ສາທາລະນະລັດ ເກົາຫລີ ທີ່ມີຈຸດປະສົງແນໃສ່ສ້າງ ແລະ ພັດທະນາລະບົບຖານຂໍ້ມູນນິຕິກຳຂອງຂະແໜງອຸດສາຫະກໍາ ແລະ ການຄ້າ ໃຫ້ມີຄວາມທັນສະໄໝ ລວມເຖິງຊ່ວຍຍົກລະດັບເຄື່ອງມືໄອທີ ຢູ່ ພະແນກ ອຄ ແຂວງ ແລະ ຫ້ອງການ ອຄ ເມືອງເປົ້າໝາຍ.

ໂຄງການນີ້ມີຄວາມໝາຍຄວາມສຳຄັນສູງ ຊຶ່ງໄດ້ປະກອບສ່ວນອັນສຳຄັນເຂົ້າໃນການຜັນຂະຫຍາຍທິດເພີ່ມທະວີການຄຸ້ມຄອງຂະແໜງອຸດສາຫະກຳ ແລະ ການຄ້າດ້ວຍລະບຽບກົດໝາຍ ເທື່ອລະກ້າວ, ໂດຍແນໃສ່ສ້າງເວັບໄຊ້ຖານຂໍ້ມູນນິຕິກຳ ແບບເອເລັກໂຕຣນິກ ທີ່ທຸກພາກສ່ວນໃນສັງຄົມສາມາດເຂົ້າເຖິງໄດ້ ໂດຍສະເພາະຫ້ອງການ ອຄ ເມືອງ ແລະ ພະແນກ ອຄ ແຂວງ ທີ່ເປັນຜູ້ຈັດຕັ້ງປະຕິບັດໂດຍກົງ ໃຫ້ສາມາດເຂົ້າເຖິງຂໍ້ມູນໄດ້ຢ່າງວ່ອງໄວ, ຮັບປະກັນປະສິດທິຜົນຂອງວຽກງານ. ນອກຈາກນີ້, ຍັງສ້າງຄວາມໂປ່ງໃສໃນການຂະບວນການອອກນິຕິກຳ ຊຶ່ງທົ່ວສັງຄົມສາມາດມີສ່ວນຮ່ວມໃນການປະກອບຄຳໃສ່ຮ່າງນິຕິກຳຂອງຂະແໜງ ອຄ ໂດຍກົງ, ເພີ່ມຄວາມເຊື່ອໝັ້ນໃຫ້ພາກທຸລະກິດ ແລະ ຄວາມແນ່ນອນທາງດ້ານກົດໝາຍໃນການຈັດຕັ້ງປະຕິບັດນິຕິກຳ, ຊ່ວຍຫຼຸດຜ່ອນຕົ້ນທຶນ ແລະ ປະກົດການຫຍໍ້ທໍ້ໃນຂອດຈັດຕັ້ງປະຕິບັດ. ອັນສຳຄັນ ແມ່ນໄດ້ປະກອບສ່ວນຢ່າງແຂງແຮງແກ່ການບັນລຸເນື້ອໃນຈິດໃຈຂອງ ຄຳສັ່ງນາຍົກລັດຖະມົນຕີ ສະບັບເລກທີ 02/ນຍ ວ່າດ້ວຍ ການປັບປຸງບັນດາລະບຽບການ ແລະ ກົນໄກປະສານງານໃນການດຳເນີນທຸລະກິດຢູ່ ສປປ ລາວ ໃຫ້ມີຄວາມຄ່ອງຕົວຍິ່ງຂຶ້ນ. ຊຶ່ງໄດ້ຢັ້ງຢືນໃຫ້ເຫັນຢ່າງຈະແຈ້ງຈາກຈຳນວນຜູ້ເຂົ້າຢ້ຽມຢາມເວັບໄຊ້ຖານຂໍ້ມູນນິຕິກຳຂອງພວກເຮົາ ນັບແຕ່ມື້້ເປີດນຳໃຊ້ຢ່າງເປັນທາງການ ມາເຖິງປະຈຸບັນ ທີ່ມີຫຼາຍກວ່າ 2 ລ້ານເທື່ອຄັ້ງ ແລະ ຍັງສືບຕໍ່ມີທ່າອ່ຽງເພີ່ມຂຶ້ນ.

Uncategorized